अपहरणकारीलाई कारवाही गर्न प्रधानमन्त्रीको निर्देशन

प्रधानमन्त्री गिरिजाप्रसाद कोइरालाले नोवल एकेडेमी र नोवल मेडिकल कलेजका संचालक तथा पदाधिकारीलाई अपहरण तथा कुटपिट गर्नेलाई तत्काल कारवाही गर्न गृहमन्त्रीलाई निर्देशन दिएका छन् । मङ्सिर ११ गते आफ्नो निवास बालुवाटारमा अपहरणकारीलाई कारवाही गर्नुपर्ने माग उल्लेखित ज्ञापनपत्र लिएर आएका उच्च माध्यमिक विद्यालय आन्दोलन समितिका पदाधिकारीका अघि प्रधानमन्त्रीले गृहमन्त्रीलाई यस्तो निर्देशन दिएका हुन् । प्रधानमन्त्रीको निर्देशनपछि गृहमन्त्री कृष्णप्रसाद सिटौलाले अपहरणकारीलाई 'एक दुई दिन भित्रै' पक्राउ गरि कारवाही गर्ने बताएका थिए । । मङ्सिर २ गते माओवादी कार्यकर्ताहरुले आफ्नो पार्टीका नेता वर्षामान पुन अनन्तले बोलाएको भन्दै नोवल एकेडेमी र नोवल मेडिकल कलेजका संचालक तथा पदाधिकारीहरु ज्ञानेन्द्र गिरी, नवराज पाण्डे, आदित्य खनाल, उमेश पाण्डे र जनक रिजाललाई काभ्रे कामिडाँडा पुर्याएका थिए । १४ घण्टासम्म बयानका नाममा यातना दिएपछि उनीहरुलाई छाडिएको थियो । संस्थाकै अर्का लगानीकर्ता सुनिल शर्माको भनाइमा लागेर आफुहरुलाई माओवादीले अपहरण र यातना दिएको अपहरितहरुको भनाइ छ ।