भट्टराई पक्षका मजदुरले दाहाल पक्षको निर्णय नमान्ने

एकीकृत माओवादी निकट अखिल नेपाल होटेल तथा रेष्टुरा मजदुर संघको राष्ट्रिय भेलालाई उपाध्यक्ष बाबुराम भट्टराई पक्षधर मजदुर नेताले बहिस्कारको घोषणा गरेका छन्।
राजधानीमा पत्रकार सम्मेलनको आयोजना गरी भट्टराई पक्षधर मजदुर नेताले ३० गते पोखरामा सम्पन्न हुन गइरहेको सो सम्मेलन एक पक्षीय भएको भन्दै बहिस्कार गर्न लागेका हुन्।
पार्टीको निर्णय २९(३० मा काठमाडौं सम्मेलन गर्ने भनिएको छ तर सम्मेलन पोखरामा गर्ने एकलौटी निर्णय गरियो, नेवाः राज्य समितिवाट ४ सय र अन्यवाट २ सय प्रतिनिधि बनाउने भन्नेछ। तर मनलाग्दी १ हजार प्रतिनिधि बनाउने काम भयो,भट्टराई पक्ष मजदुर नेता मुक्ति दाहालले भने,त्यसकारण अध्यक्ष प्रचण्ड निकटहरुले गरेको एकलैटी निर्णय हामीलाई मान्य छैनौं। सो बारे पार्टीलाई जानकारी पनि गराइसकेको दाहालको भनाई छ।

असोज १९ गते एमालेले शक्ति प्रदर्शन गर्ने

नेकपा एमालेले वर्तमान सरकारको बहिगर्मनका लागि आउँदो असोज १९ गते काठमाडौँमा बृहद् जनप्रदर्शन र आमसभाको तयारीमा जुट्न पार्टी निकटका भ्रातृ संस्थाका पदाधिकारीहरूलाई निर्देशन दिएको छ।
पार्टी कार्यालय बल्खुमा आज आयोजित विभिन्न १९ वटा भ्रातृ सङ्गठनका पदाधिकारीको भेलालाई सम्बोधन गर्दै एमालेका अध्यक्ष झलनाथ खनालले वर्तमान सत्ताधारी गठबन्धनले सहमति र वार्ताको नाममा आफूहरूलाई अल्मल्याउन खोजेको बताए।
उनले गतिरोधको निकासका लागि राष्ट्रपतिले कानुनको दायरामा रही सक्रिय तथा सचेत भूमिका निर्वाह गर्नुपर्ने आवश्यकता औँल्याए।
अध्यक्ष खनालले यस भदौ महिनाभित्र राजनीतिक निकासको कुनै सम्भावना नरहेको र असोज १९ गतेसम्म पनि सहमति नभए कडा आन्दोलनमा उत्रने चेतावनी दिए।

सुनको भाउमा दिनहुँ नयाँ कीर्तिमान

प्राय दिनहुँ जसो नयाँ रेकर्ड कायम गर्दै आएको सुनको भाउले सोमवार नयाँ कीर्तिमान वनाएको छ । आइतवार प्रतितोला ६१ हजार १ सय १९ रुपैयाँ पुगेको छापावाल सुन सोमवार प्रतितोला ५८ रुपैयाँले वढेर प्रतितोला ६१ हजार १ सय ७७ रुपैयाँ पुगेको नेपाल सुनचाँदी संघका सचिव दियेशरत्न शाक्यले जानकारी दिनुभयो ।
यसैगरी तेजावी सुन पनि प्रतितोला ५८ रुपैयाँले नै बढेको छ । आइतवार प्रतितोला ६० हजार ८ सय ६९ रुपैयाँमा कारोवार भएको तेजावी सुन सोमवार प्रतितोला ६० हजार ९ सय २६ रुपैयाँमा कारोवार भइरहेको छ । यस्तै चाँदीको मूल्य पनि आइतवारको तुलनामा सोमवार प्रतितोला १० रुपैयाँले वढेको छ । आइतवार प्रतितोला ११ सय ९० रुपैयाँ कारोवार भएको चाँदी सोमवार प्रतितोला १२ सय रुपैयाँ पुगेको छ ।

अहिले अन्तर्राष्ट्रिय बजारमा डलरको भाउ केही सस्तो भएको र भारतीय रुपैयाँ पनि कमजोर भएकाले सुनको भाऊ बढेकोले त्यसको असर नेपाली बजारमा पनि परेको नेपाल सुनचाँदी व्यवसायी संघका सचिव दियेशरत्न शाक्यले जानकारी दिनुभयो ।

माओवादी फुट्यो–नया पार्टीको नाम नेकपा माओवादी,फागुन १ गते महाधिवेशन गरिने

प्रकाश गिरी
अब एकिकृत नेकपा माओवादी एकिकृत रहेन । तिन देखि राजधानीको बौद्धमा जारी भेलामा माओवादी बरिष्ठ उपाध्यक्ष मोहन बैद्य पक्षधर समुहले नया पार्टी गठन गर्ने निधो गरेपछि एकिकृत नेकपा माओवादी भनेर अहिले सम्म भीमकाय स्वरुप धारण गरेको माओवादी विभाजन भएको हो । बौद्धमा शनिवार देखि जारी राष्ट्रिय भेलाका सहभागीले नया पार्टी गठन गर्ने कुरामा सम्मति दिएका थिए । उनीहरुले नया पार्टी गठन गर्ने नेतृत्वको प्रस्ताव, विधान, र पार्टीको नाम संशोधन सहित सर्वसम्मतिले पास गरे । यसपछि अब नया मोहन बैद्यले नेतृत्व गरेको नया पार्टीको नाम नेकपा माओवादी रहने भएको छ । पार्टी वहुपदीय पद्धतिमा जाने छ ।
यहि भेलाले विगत २० बर्ष देखि हुन नसकेको महाधिवेशन आगामी फागुन १ गते गर्ने निधो पनि गरेको छ । २०५२साल फागुन १ गते माओवादी ससस्त्र युद्ध गर्ने भन्दै भुमिगत भएको थियो । यहि ऐतिहासिक दिनको सम्झना गर्दै बैद्य पक्षधर माओवादीले महाधिवेशन गर्ने मिति तय गरेको हो । भेलाले पार्टी वहुपदीय परिपाटीमा जाने निर्णय पनि गरेको छ । त्यतिवेला सम्मको लागि नेकपा माओवादीको अध्यक्षता मोहन वैद्य स्वयमले गर्नेछन भने यसको महासचिवमा रामवहादुर थापा तथा सचिवमा सीपी गजुरेल हुने भएको छन । देव गुरु¨ र नेत्रविक्रम चन्दलाई स्थायी समितिमा चयन गरिएको छ । यी नेताहरुले एकिकृत नेकपा माओवादीमा पनि यहि जिम्मेवारी सम्हालेका थिए । वैद्यको पार्टीमा तत्कालको लागि ७५सदस्यीय केन्द्रिय समिति गठन गरिने भएको छ । पुरानो पार्टीमा केन्द्रिय सदस्य भएकाहरु यस नया पार्टीमा स्वत केन्द्रिय सदस्य हुनेछन । नया पार्टीले क्रान्ति सफल पार्नको लागि जनयुद्ध गर्न सक्ने सम्मका लक्ष्य लिएको छ ।